ଦୁର୍ନୀତି କଲେ କଠୋର କାର୍ଯ୍ୟାନୁଷ୍ଠାନ ଅନିବାର୍ଯ୍ୟ: ନବନିଯୁକ୍ତ ୩୩୬ ଏସ୍‌ଆଇଙ୍କୁ ମୁଖ୍ୟମନ୍ତ୍ରୀଙ୍କ କଡ଼ା ଚେତାବନୀ, ଦୁର୍ନୀତିକୁ ‘ବିଷ’ ମନେ କରି ଦୂରେଇ ରହିବାକୁ ଆହ୍ୱାନ

ଭୁବନେଶ୍ୱର, କଳିଙ୍ଗ ସମ୍ବାଦ  (ଲାଲୁ ପ୍ରସାଦ ମଳ):
“ଦୁର୍ନୀତି ହେଉଛି ଏକ ବିଷ ସଦୃଶ। ଯେଉଁ ବିଭାଗରେ କାର୍ଯ୍ୟ କଲେ ମଧ୍ୟ ସାମ୍ନାକୁ ଅନେକ ପ୍ରଲୋଭନ ଆସିବ, କିନ୍ତୁ ନିଜକୁ ସେଥିରୁ ସମ୍ପୂର୍ଣ୍ଣ ଦୂରେଇ ରଖିବାକୁ ହେବ। ଯଦି କେହି ଦୁର୍ନୀତିରେ ଲିପ୍ତ ରୁହନ୍ତି, ତେବେ ତାଙ୍କ ବିରୋଧରେ କଠୋରରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।” ରବିବାର ପୋଲିସ ତାଲିମ ପ୍ରତିଷ୍ଠାନରେ ଆୟୋଜିତ ୩୩୬ ଜଣ ନବନିଯୁକ୍ତ ସବ୍-ଇନ୍ସପେକ୍ଟର (SI)ଙ୍କ ପାସିଂ ଆଉଟ ପରେଡ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ଏହି କଡ଼ା ଚେତାବନୀ ଓ ପରାମର୍ଶ ଦେଇଛନ୍ତି ମୁଖ୍ୟମନ୍ତ୍ରୀ। ତାଲିମ ସମାପ୍ତ କରି ଆନୁଷ୍ଠାନିକ ଭାବେ ପୋଲିସ ସେବାରେ ପ୍ରବେଶ କରିଥିବା ଯୁବ ଅଧିକାରୀମାନଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଛନ୍ତି ଯେ, ପୋଲିସ ଚାକିରି କେବଳ ଏକ ପେଶା ନୁହେଁ, ଏହା ଜନସାଧାରଣଙ୍କ ସେବା ଓ ସୁରକ୍ଷାର ଏକ ପବିତ୍ର ଦାୟିତ୍ୱ। କର୍ମମୟ ଜୀବନରେ ପ୍ରବେଶ କରିବା ମାତ୍ରେ ଅନେକ ପ୍ରଲୋଭନ ସାମ୍ନାକୁ ଆସିପାରେ, କିନ୍ତୁ ଜଣେ ପ୍ରକୃତ କର୍ତ୍ତବ୍ୟନିଷ୍ଠ ଅଧିକାରୀ ସବୁବେଳେ ନିଜ ନୈତିକତା ଓ ସାଧୁତାକୁ ପ୍ରାଥମିକତା ଦେବା ଉଚିତ। ଦୁର୍ନୀତିକୁ ଏକ ବିଷାକ୍ତ ତତ୍ତ୍ୱ ବୋଲି ବିବେଚନା କରି ତାହାଠାରୁ ଯୋଜନ ଯୋଜନ ଦୂରରେ ରହିବାକୁ ସେ ନବନିଯୁକ୍ତ ଅଧିକାରୀମାନଙ୍କୁ ଆହ୍ୱାନ ଦେଇଛନ୍ତି।

ମୁଖ୍ୟମନ୍ତ୍ରୀ ପୁଣି ଥରେ ସ୍ପଷ୍ଟ କରିଛନ୍ତି ଯେ ପ୍ରଶାସନରେ ସ୍ୱଚ୍ଛତା ବଜାୟ ରଖିବା ପାଇଁ ରାଜ୍ୟ ସରକାର ‘ଶୂନ୍ୟ ସହନଶୀଳତା’ (Zero Tolerance) ନୀତି ଆପଣେଇଛନ୍ତି। ପୋଲିସ ପ୍ରଶାସନ ଉପରେ ସାଧାରଣ ଜନତାଙ୍କ ଅଗାଧ ବିଶ୍ୱାସ ରହିଛି; ତେଣୁ ସେହି ବିଶ୍ୱାସରେ ଯେପରି କୌଣସି ପ୍ରକାର ଆଞ୍ଚ ନ ଆସେ, ସେଥିପ୍ରତି ସତର୍କ ରହିବାକୁ ହେବ। କୌଣସି ସ୍ତରରେ ଦୁର୍ନୀତି କିମ୍ବା ଅନିୟମିତତାକୁ ଆଦୌ ବରଦାସ୍ତ କରାଯିବ ନାହିଁ। ଯଦି କୌଣସି ଅଧିକାରୀ ବା କର୍ମଚାରୀ ଦୁର୍ନୀତିରେ ଲିପ୍ତ ଥିବା ପ୍ରମାଣିତ ହୁଏ, ତେବେ ତାଙ୍କ ପଦବୀ ଯାହା ହୋଇଥାଉ ନା କାହିଁକି, ଆଇନ ଅନୁଯାୟୀ ଦୃଷ୍ଟାନ୍ତମୂଳକ ଦଣ୍ଡବିଧାନ କରାଯିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ନବନିଯୁକ୍ତ ୩୩୬ ଜଣ ଏସ୍‌ଆଇଙ୍କୁ ଶୁଭେଚ୍ଛା ଜଣାଇବା ସହ ସମାଜର ଶେଷ ପାହାଚରେ ଥିବା ଗରିବ, ଅସହାୟ ଓ ପୀଡ଼ିତ ଲୋକଙ୍କୁ ତୁରନ୍ତ ନ୍ୟାୟ ପ୍ରଦାନ କରିବା ଦିଗରେ ନିଷ୍ଠାପର ଭାବେ କାର୍ଯ୍ୟ କରିବାକୁ ପରାମର୍ଶ ଦେଇଛନ୍ତି। ଉକ୍ତ ସମାରୋହରେ ପୋଲିସ ମହାନିର୍ଦ୍ଦେଶକ (DGP)ଙ୍କ ସମେତ ବହୁ ବରିଷ୍ଠ ଆଇପିଏସ୍ ଅଧିକାରୀ ଓ ନବନିଯୁକ୍ତ ପ୍ରୋବେସନରମାନଙ୍କ ଅଭିଭାବକମାନେ ଉପସ୍ଥିତ ଥିଲେ।