କଳାହାଣ୍ଡିର ନିଆରା ବୈଦ୍ୟରାଜ: ସ୍ୱଳ୍ପ ଖର୍ଚ୍ଚରେ ରୋଗୀଙ୍କୁ ଦେଉଛନ୍ତି ନୂଆ ଜୀବନ, ଘଣ୍ଟବାହାଲିରେ ଆୟୋଜନ କଲେ ମହାକାଳ ମନ୍ଦିରର ରତ୍ନମୁଦ ଉତ୍ସବ

ଭବାନୀପାଟଣା/ଘଣ୍ଟବାହାଲି: ରୋହିତ କୁମାର ନିଆଲ (କଳିଙ୍ଗ ସମ୍ବାଦ) ଆଜିକାଲିର ସମାଜରେ ଯେଉଁଠି ଡାକ୍ତରୀ ଚିକିତ୍ସା ଦିନକୁ ଦିନ ବ୍ୟୟବହୁଳ ହେବାରେ ଲାଗିଛି ଏବଂ ମଣିଷ ଅର୍ଥ ପଛରେ ଗୋଡ଼ାଉଛି, ସେଠାରେ ସମାଜ ପାଇଁ ଏକ ଅନନ୍ୟ ଉଦାହରଣ ସୃଷ୍ଟି କରିଛନ୍ତି କଳାହାଣ୍ଡି ଜିଲ୍ଲା ଭବାନୀପାଟଣା ବ୍ଲକ୍ ଚହଗାଁ ପଞ୍ଚାୟତ ଅନ୍ତର୍ଗତ ଘଣ୍ଟବାହାଲି ଗ୍ରାମର ବୈଦ୍ୟରାଜ ଧର୍ମୁ ନାଏକ। ଦୀର୍ଘ ଦିନ ଧରି ଏକ ସେବାଶ୍ରମ ମାଧ୍ୟମରେ ଅସହାୟ ତଥା ଗରିବ ରୋଗୀଙ୍କୁ ସ୍ୱଳ୍ପ ଖର୍ଚ୍ଚରେ ଚିକିତ୍ସା ଯୋଗାଇ ଆସୁଥିବା ଏହି ନିସ୍ୱାର୍ଥପର ବ୍ୟକ୍ତିଙ୍କ ଉଦ୍ୟମରେ ଏବେ ଗାଁରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି। ବୈଦ୍ୟରାଜ ଧର୍ମୁ ନାଏକ ଏବଂ ତାଙ୍କ ସହଧର୍ମିଣୀ ଭାଗ୍ୟବତୀ ନାଏକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଘଣ୍ଟବାହାଲିସ୍ଥିତ ଶ୍ରୀ ଶ୍ରୀ ମହାକାଳ ମନ୍ଦିର ପରିସରରେ ନବନିର୍ମିତ ଶିବ ମନ୍ଦିରର ରତ୍ନମୁଦ (କୁମ୍ଭଭରା) ଉତ୍ସବ ଅଗଷ୍ଟ ୨୭ ତାରିଖ ଦିନ ମହାସମାରୋହରେ ଅନୁଷ୍ଠିତ ହୋଇଯାଇଛି। ସକାଳ ୭ଟା ୩୦ ମିନିଟ୍‌ରୁ ଆରମ୍ଭ ହୋଇ ଦିନ ୧ଟା ୩୫ ପର୍ଯ୍ୟନ୍ତ ଏହି ପବିତ୍ର ଉତ୍ସବ ଚାଲିଥିଲା। ଏହି ଅବସରରେ ବିଶେଷ ପୂଜାର୍ଚ୍ଚନା, ହୋମଯଜ୍ଞ ସହ ଉପସ୍ଥିତ ଶ୍ରଦ୍ଧାଳୁମାନଙ୍କ ପାଇଁ ଅନ୍ନ ପ୍ରସାଦ ସେବନର ବ୍ୟାପକ ବ୍ୟବସ୍ଥା କରାଯାଇଥିଲା। ପ୍ରଭୁ ମହାକାଳଙ୍କ ଆଶୀର୍ବାଦ ଲାଭ କରିବା ପାଇଁ ଆଖପାଖ ଅଞ୍ଚଳରୁ ବହୁ ସଂଖ୍ୟାରେ ଭକ୍ତଙ୍କ ଭିଡ଼ ଜମିଥିଲା।

ଉଲ୍ଲେଖଯୋଗ୍ୟ ଯେ, ବୈଦ୍ୟରାଜ ଧର୍ମୁ ନାଏକ ସ୍ଥାନୀୟ ଅଞ୍ଚଳରେ 'ଗରିବଙ୍କ ଭଗବାନ' ଭାବେ ପରିଚିତ। ନିଜର ଅଗାଧ ପାରମ୍ପରିକ ଆୟୁର୍ବେଦ ଜ୍ଞାନ ଓ ଚେରମୂଳି ଚିକିତ୍ସା ବଳରେ ସେ ଅନେକ ପୁରୁଣା ଏବଂ ଅସାଧ୍ୟ ରୋଗର ଉପଶମ କରିପାରୁଛନ୍ତି। ବଡ଼ ବଡ଼ ଡାକ୍ତରଖାନାରୁ ନିରାଶ ହୋଇ ଫେରୁଥିବା ରୋଗୀମାନେ ତାଙ୍କ ଆଶ୍ରମକୁ ଆସି ସୁସ୍ଥ ହେଉଛନ୍ତି। ଏହି ଚିକିତ୍ସା ପାଇଁ ସେ କୌଣସି ମୋଟା ଅଙ୍କର ଫିସ୍ ବଦଳରେ କେବଳ ଔଷଧର ସାମାନ୍ୟ ଖର୍ଚ୍ଚ ନେଇଥାନ୍ତି। ବୈଦ୍ୟରାଜଙ୍କ ମତରେ, ରୋଗୀମାନେ ଯନ୍ତ୍ରଣାରୁ ମୁକ୍ତ ହୋଇ ହସି ହସି ଘରକୁ ଫେରିଲେ ତାଙ୍କୁ ପ୍ରକୃତ ଆତ୍ମଶାନ୍ତି ମିଳିଥାଏ। ନିଜ ଜୀବନର ଅଧିକାଂଶ ସମୟ ସମାଜ ସେବାରେ ସମର୍ପିତ କରିଥିବା ଏହି ମହାନ୍ ବ୍ୟକ୍ତିଙ୍କ ଉଦ୍ୟମରେ ନିର୍ମିତ ମହାକାଳ ମନ୍ଦିର ଏବେ ସମଗ୍ର ଅଞ୍ଚଳରେ ଏକ ପ୍ରମୁଖ ଆସ୍ଥା ଓ ବିଶ୍ୱାସର କେନ୍ଦ୍ରବିନ୍ଦୁ ପାଲଟିଛି। ତାଙ୍କର ଏହି ନିସ୍ୱାର୍ଥପର ସେବା ଓ ଆଧ୍ୟାତ୍ମିକ ଚେତନା ପ୍ରମାଣିତ କରୁଛି ଯେ ଆଜିର ସମାଜରେ ମଣିଷ ପଣିଆ ଆଜି ବି ବଞ୍ଚି ରହିଛି।