ଅଭିନବ ଉପାୟରେ ବେଆଇନ ଗୋଚାଲାଣ: ବାରିପଦାରେ ତେଲ ଟ୍ୟାଙ୍କରରୁ ୨୦ରୁ ଊର୍ଦ୍ଧ୍ୱ ଗୋରୁ ଉଦ୍ଧାର, ୨ ଅଟକ

ବାରିପଦା/କଳିଙ୍ଗ ଦର୍ପଣ (ରୋହିତ କୁମାର ନିଆଲ): ବେଆଇନ ଗୋଚାଲାଣକାରୀମାନେ ପୋଲିସ ଆଖିରେ ଧୂଳି ଦେବା ପାଇଁ ଏବେ ନୂଆ ନୂଆ ଉପାୟ ଆପଣାଉଛନ୍ତି। ଏହିଭଳି ଏକ ଅଭିନବ ତଥା ଆଶ୍ଚର୍ଯ୍ୟଜନକ ଘଟଣା ବାରିପଦାରେ ଦେଖିବାକୁ ମିଳିଛି, ଯେଉଁଠାରେ ଏକ ତେଲ ଟ୍ୟାଙ୍କର ଭିତରେ ବେଆଇନ ଭାବେ ଗୋରୁ ଚାଲାଣ କରାଯାଉଥିଲା। ତେବେ ବାଙ୍ଗିରିପୋଷି ପୋଲିସର ସକ୍ରିୟତା ଓ ତତ୍ପରତା ଯୋଗୁଁ ଏହି ବେଆଇନ କାର୍ଯ୍ୟର ପର୍ଦ୍ଦାଫାଶ ହୋଇପାରିଛି।

​ସୂଚନା ଅନୁଯାୟୀ, ବାଙ୍ଗିରିପୋଷି ପୋଲିସ ବିଶେଷ ସୂତ୍ରରୁ ଖବର ପାଇ ପୁନସିଆ ରେଳ ପୋଲ ନିକଟରେ କଡ଼ା ନାକାବନ୍ଦୀ କରିଥିଲା। ଯାଞ୍ଚ ସମୟରେ ସେହି ରାସ୍ତା ଦେଇ ଯାଉଥିବା ଏକ ତେଲ ଟ୍ୟାଙ୍କର ଉପରେ ପୋଲିସର ସନ୍ଦେହ ହୋଇଥିଲା। ଟ୍ୟାଙ୍କରଟିକୁ ଅଟକାଇ ଯାଞ୍ଚ କରିବା ପରେ ଭିତରର ଦୃଶ୍ୟ ଦେଖି ପୋଲିସ ଆଶ୍ଚର୍ଯ୍ୟ ହୋଇଯାଇଥିଲା। ଟ୍ୟାଙ୍କର ଭିତରେ ତେଲ ବଦଳରେ ଅତି ନିର୍ଦ୍ଦୟ ଓ ଅମାନବୀୟ ଭାବେ ୨୦ରୁ ଊର୍ଦ୍ଧ୍ୱ ଗୋରୁଙ୍କୁ ବୋଝେଇ କରି ଚାଲାଣ କରାଯାଉଥିଲା।

​ପୋଲିସ ତୁରନ୍ତ ଟ୍ୟାଙ୍କରକୁ ଜବତ କରିବା ସହ ସମସ୍ତ ଗୋରୁଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି। ଏହା ସହିତ ଘଟଣାସ୍ଥଳରୁ ଟ୍ୟାଙ୍କରର ଡ୍ରାଇଭର ଏବଂ ହେଲପରଙ୍କୁ ଅଟକ ରଖି ପଚରାଉଚରା କରୁଛି। ଏତେ ବଡ଼ ସଂଖ୍ୟାରେ ଗୋରୁ କେଉଁଠାରୁ ଅଣାଯାଉଥିଲା, ଏହି ବେଆଇନ ବେପାର ପଛରେ କେଉଁ ମାଫିଆଙ୍କ ହାତ ଅଛି ଏବଂ ଗୋରୁଗୁଡ଼ିକୁ କେଉଁ ସ୍ଥାନକୁ ଚାଲାଣ କରାଯାଉଥିଲା, ସେ ନେଇ ବାଙ୍ଗିରିପୋଷି ପୋଲିସ ଅଧିକ ତଦନ୍ତ ଜାରି ରଖିଛି। ପୋଲିସକୁ ଫାଙ୍କିବା ପାଇଁ ତେଲ ଟ୍ୟାଙ୍କରର ବ୍ୟବହାର ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।