ବୋରଗୁଡ଼ା ଅଙ୍ଗନବାଡ଼ି କେନ୍ଦ୍ରରେ ‘ଆଙ୍ଗନ କା ଉତ୍ସବ’: ଶିଶୁଙ୍କ ପ୍ରାରମ୍ଭିକ ଶିକ୍ଷା ଓ ସର୍ବାଙ୍ଗୀଣ ବିକାଶ ଉପରେ ଗୁରୁତ୍ୱ

ଜୟପାଟଣା (କଳିଙ୍ଗ ଦର୍ପଣ / ଭୂପେନ୍ଦ୍ର ଦୁର୍ଗା):

କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ୍ ଅନ୍ତର୍ଗତ ବଡ଼ପୁଝାରିଗୁଡ଼ା ପଞ୍ଚାୟତର ବୋରଗୁଡ଼ା ଗ୍ରାମସ୍ଥିତ ଅଙ୍ଗନବାଡ଼ି କେନ୍ଦ୍ର ପରିସରରେ ‘ଆଙ୍ଗନ କା ଉତ୍ସବ’ ଉତ୍ସାହ ଉଦ୍ଦୀପନା ମଧ୍ୟରେ ପାଳିତ ହେଉଛି। ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଶିଶୁମାନଙ୍କ ପ୍ରାରମ୍ଭିକ ଶିକ୍ଷା, ମାନସିକ ଓ ଶାରୀରିକ ସୁସ୍ଥତା ତଥା ସୃଜନଶୀଳତାର ବିକାଶକୁ ମୁଖ୍ୟ ପ୍ରାଥମିକତା ଦିଆଯାଇଛି।

ସୂଚନା ଅନୁଯାୟୀ, ଏହି କାର୍ଯ୍ୟକ୍ରମ ଚଳିତ ସେପ୍ଟେମ୍ବର ୨୭ ତାରିଖରୁ ଆରମ୍ଭ ହୋଇ ଆସନ୍ତା ୨୯ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ ଚାଲିବ। ଏହି ତିନି ଦିନ ବ୍ୟାପୀ ଉତ୍ସବରେ ପ୍ରତିଦିନ ସକାଳ ୧୦ ଘଟିକାରୁ ଦିନ ୨ ଘଟିକା ପର୍ଯ୍ୟନ୍ତ ବିଭିନ୍ନ ଶିକ୍ଷଣୀୟ କାର୍ଯ୍ୟକ୍ରମର ଆୟୋଜନ କରାଯାଉଛି। କୋମଳମତି ଶିଶୁମାନଙ୍କୁ ପାଠପଢ଼ା ପ୍ରତି ଆଗ୍ରହୀ କରିବା ଲାଗି ଚିତ୍ରାଙ୍କନ, ଗଳ୍ପ କହିବା, ମନୋରଞ୍ଜନଧର୍ମୀ ଖେଳ ଏବଂ ସୃଜନଶୀଳ କାର୍ଯ୍ୟକଳାପ ଅନୁଷ୍ଠିତ ହେଉଛି।

ଏହି କାର୍ଯ୍ୟକ୍ରମରେ ଅଙ୍ଗନବାଡ଼ି କର୍ମୀ, ସହାୟିକା ତଥା ଗ୍ରାମର ଅଭିଭାବକମାନେ ଉପସ୍ଥିତ ରହି ଶିଶୁମାନଙ୍କୁ ଉତ୍ସାହିତ କରିବା ସହ କାର୍ଯ୍ୟକ୍ରମକୁ ସଫଳ କରିବାରେ ପୂର୍ଣ୍ଣ ସହଯୋଗ କରୁଛନ୍ତି। ଶିଶୁମାନଙ୍କ ମୂଳଦୁଆ ସୁଦୃଢ଼ କରିବା ସହ ସେମାନଙ୍କ ସର୍ବାଙ୍ଗୀଣ ବିକାଶ କ୍ଷେତ୍ରରେ ଅଙ୍ଗନବାଡ଼ି କେନ୍ଦ୍ରର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଏହି ଅବସରରେ ମତପ୍ରକାଶ ପାଇଛି।