ଶ୍ରୀ ଶ୍ରୀ ଠାକୁରଙ୍କ ୧୩୯ତମ ଆବିର୍ଭାବ ତିଥି ଉଦ୍‌ଯାପିତ: ଜୁନାଗଡ଼ ସତସଙ୍ଗ କେନ୍ଦ୍ର ପକ୍ଷରୁ ରୋଗୀଙ୍କୁ ଫଳ ଓ ଶ୍ରଦ୍ଧାଳୁଙ୍କୁ ପ୍ରସାଦ ବଣ୍ଟନ

ଜୁନାଗଡ଼, କଳିଙ୍ଗ ସମ୍ବାଦ (ପୂର୍ଣେନ୍ଦୁ କୁମାର ମାଝୀ):

ପରମ ପ୍ରେମମୟ ଶ୍ରୀ ଶ୍ରୀ ଠାକୁରଙ୍କ ଶୁଭ ୧୩୯ତମ ଆବିର୍ଭାବ (ତାଳନବମୀ) ତିଥି ରବିବାର ଦିନ ଜୁନାଗଡ଼ ଠାରେ ଭକ୍ତିପୂର୍ଣ୍ଣ ତଥା ଆଧ୍ୟାତ୍ମିକ ପରିବେଶ ମଧ୍ୟରେ ପାଳିତ ହୋଇଯାଇଛି। ଏହି ପବିତ୍ର ତିଥି ଅବସରରେ ଜୁନାଗଡ଼ ସତସଙ୍ଗ କେନ୍ଦ୍ର ପକ୍ଷରୁ ଦିନତମାମ୍ ବିଭିନ୍ନ ସେବାମୂଳକ କାର୍ଯ୍ୟକ୍ରମର ଆୟୋଜନ କରାଯାଇଥିଲା।

ପ୍ରାପ୍ତ ସୂଚନା ଅନୁଯାୟୀ, ରବିବାର ସକାଳ ପ୍ରାୟ ୧୦ଟା ସମୟରେ ସ୍ଥାନୀୟ ମେନ୍ ରୋଡ୍‌ସ୍ଥିତ ଜୁନାଗଡ଼ ସତସଙ୍ଗ କେନ୍ଦ୍ର ସମ୍ମୁଖରେ ଶ୍ରଦ୍ଧାଳୁ, ଭକ୍ତ ଏବଂ ସାଧାରଣ ପଥଚାରୀଙ୍କ ଉଦ୍ଦେଶ୍ୟରେ ମିଷ୍ଟାନ୍ନ (ପ୍ରସାଦ) ବଣ୍ଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହାପରେ ସତସଙ୍ଗ କେନ୍ଦ୍ରର ପ୍ରତିନିଧିମାନେ ଜୁନାଗଡ଼ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଯାଇ ସେଠାରେ ଚିକିତ୍ସାଧୀନ ଥିବା ରୋଗୀମାନଙ୍କୁ ଭେଟିଥିଲେ। ରୋଗୀମାନଙ୍କୁ ଫଳ ଓ ବିସ୍କୁଟ୍ ଆଦି ବଣ୍ଟନ କରାଯିବା ସହ ଠାକୁରଙ୍କ ନିକଟରେ ସେମାନଙ୍କର ଆଶୁ ଆରୋଗ୍ୟ ତଥା ସୁସ୍ଥତା କାମନା କରାଯାଇଥିଲା।

ଏହି ସେବାମୂଳକ କାର୍ଯ୍ୟକ୍ରମରେ ଜୁନାଗଡ଼ ସତସଙ୍ଗ କେନ୍ଦ୍ରର ସଭାପତି ତଥା ଋତ୍ୱିକ୍ (ଏସ୍‌ପିଆର୍) ରମେଶ ଚନ୍ଦ୍ର ନାୟକ, ପରିଚାଳନା କମିଟି ସଭାପତି ରଶ୍ମି ରଞ୍ଜନ ନାୟକ ଏବଂ ସାଧାରଣ ସମ୍ପାଦକ ସରୋଜ ବରାଳ ପ୍ରମୁଖ ଉପସ୍ଥିତ ଥିଲେ। ସେହିପରି ଅନ୍ୟମାନଙ୍କ ମଧ୍ୟରେ ବରିଷ୍ଠ ସଦସ୍ୟ ମଧୁସୂଦନ ପଣ୍ଡା, ଧୀରେନ୍ଦ୍ର ପଣ୍ଡା, ମନୋରଞ୍ଜନ ପାଣିଗ୍ରାହୀ, ସ୍ୱସ୍ତିଦୀପ ଆଦିତ୍ୟ, ଜଗବନ୍ଧୁ ସାହୁ, ସସ୍ମିତା ନାୟକ, ବନଲତା ସାହୁ, ମନୋରଞ୍ଜନ ଦୋରା, ସୋମନାଥ କାୟସ୍ଥ, ସୁରେଶ ଚନ୍ଦନ, ଅଭିଳାଷ ପୂଝାରୀ, ଅମିୟ ଜେନା, ସୀତାକାନ୍ତ ଧ. ମାଝୀ ଓ ଅଖିଳ ସାହୁଙ୍କ ସମେତ ସତସଙ୍ଗ କେନ୍ଦ୍ରର ବହୁ ଦାଦା ଓ ମା’ମାନେ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନାରେ ସକ୍ରିୟ ସହଯୋଗ କରିଥିଲେ।

ସମସ୍ତ ସଦସ୍ୟଙ୍କ ମିଳିତ ସହଯୋଗ ଏବଂ ସେବା ମନୋଭାବ ଯୋଗୁଁ ପ୍ରସାଦ ଓ ଫଳ ବଣ୍ଟନ କାର୍ଯ୍ୟକ୍ରମ ସୁଚାରୁରୂପେ ସମ୍ପନ୍ନ ହୋଇପାରିଥିଲା। ଶ୍ରୀ ଶ୍ରୀ ଠାକୁରଙ୍କ ଆବିର୍ଭାବ ତିଥିରେ ଆୟୋଜିତ ଏହି ସେବାମୂଳକ ପଦକ୍ଷେପ ସ୍ଥାନୀୟ ଅଞ୍ଚଳରେ ଭକ୍ତି, ମାନବସେବା ତଥା ଭାଇଚାରାର ଏକ ସୁନ୍ଦର ଉଦାହରଣ ସୃଷ୍ଟି କରିଛି।