ଶ୍ରୀମନ୍ଦିର ସିଂହଦ୍ୱାରରେ ମହାକୁମ୍ଭର ଭାଇରାଲ ନାଗାସାଧୁଙ୍କ ଧାରଣା: ତ୍ରିଶୂଳ ପୁନଃସ୍ଥାପନ ଦାବି ସହ ୧୬୪୭ ମସିହାର ମଠକୁ ନେଇ ନକଲି ମହନ୍ତଙ୍କ ନାଁରେ ସଙ୍ଗୀନ ଅଭିଯୋଗ

ପୁରୀ (କଲିଙ୍ଗ ଦର୍ପଣ): ସତ୍ୟ ଦାସ

ଶ୍ରୀଜଗନ୍ନାଥ ଧାମ ପୁରୀର ସିଂହଦ୍ୱାର ସମ୍ମୁଖରେ ଏବେ ଏକ ବଡ଼ ଧରଣର ବିବାଦ ମୁଣ୍ଡ ଟେକିଛି। ନିକଟରେ ମହାକୁମ୍ଭମେଳାରେ ନିଜର ଆଧ୍ୟାତ୍ମିକ ଚିନ୍ତାଧାରା ପାଇଁ ୧୩ ନିୟୁତରୁ (13 Million) ଅଧିକ ଲୋକଙ୍କ ଦୃଷ୍ଟି ଆକର୍ଷଣ କରିଥିବା ଜଣେ ଭାଇରାଲ୍ ନାଗାସାଧୁ ଏବେ ଶ୍ରୀମନ୍ଦିର ସିଂହଦ୍ୱାର ସମ୍ମୁଖରେ ଏକ ଖୋଲା ଟେଣ୍ଟରେ ବସି ଆନ୍ଦୋଳନ ଆରମ୍ଭ କରିଛନ୍ତି। ତାଙ୍କର ମୁଖ୍ୟ ଦାବି ହେଉଛି- ସିଂହଦ୍ୱାର ନିକଟରେ ତ୍ରିଶୂଳକୁ ତାର ପୂର୍ବ ସ୍ଥାନରେ ପୁନଃସ୍ଥାପନ କରାଯାଉ। ନଚେତ୍ ଏହା ଉଭୟ ନାଗାସାଧୁ ପରମ୍ପରା ଏବଂ ଶ୍ରୀଜଗନ୍ନାଥ ସଂସ୍କୃତି ପ୍ରତି ଚରମ ଅପମାନ।

କେବଳ ତ୍ରିଶୂଳ ନୁହେଁ, ବରଂ ଏହି ଆନ୍ଦୋଳନ ଜରିଆରେ ପୁରୀର ଏକ ପ୍ରାଚୀନ ମଠର କଳା କାରନାମା ପଦାକୁ ଆସିଛି। ୧୬୪୭ ମସିହାରେ ପ୍ରତିଷ୍ଠିତ ଏହି ପ୍ରାଚୀନ ମଠଟି ଏବେ ସମ୍ପୂର୍ଣ୍ଣ ବିପଦରେ ଥିବା ନାଗାସାଧୁ ଅଭିଯୋଗ କରିଛନ୍ତି। ତାଙ୍କ କହିବା ଅନୁଯାୟୀ, ମଠର ସ୍ୱଘୋଷିତ ମହନ୍ତ ସୋମନାଥ ପୁରୀ ପ୍ରକୃତରେ ଜଣେ ଠକ ଏବଂ ନକଲି ସାଧୁ। ସେ ନାଗା ସମ୍ପ୍ରଦାୟରେ ପଞ୍ଜିକୃତ ହୋଇନାହାନ୍ତି କିମ୍ବା ନାଗା ସନ୍ନ୍ୟାସୀଙ୍କ ନୀତିନିୟମରେ ଦୀକ୍ଷିତ ମଧ୍ୟ ହୋଇନାହାନ୍ତି। କେବଳ ସମାନ ନାମ ଏବଂ ବେଶଭୂଷାର ଫାଇଦା ଉଠାଇ ଏହି ନକଲି ସାଧୁମାନେ ମଠର ପ୍ରାୟ ୧୭୩ ଏକର ମୂଲ୍ୟବାନ ଜମିକୁ ଲୁଟ୍ କରୁଛନ୍ତି।

ଏହି ପ୍ରସଙ୍ଗରେ ସର୍ବୋଚ୍ଚ ସାଧୁ ସଙ୍ଗଠନ 'ଶ୍ରୀ ପଞ୍ଚ ଦଶନାମ ଜୁନା ଆଖଡ଼ା' ମଧ୍ୟ ନିଜର ଆଭିମୁଖ୍ୟ ସ୍ପଷ୍ଟ କରିଛି। ଅନ୍‌ଲାଇନ୍ ଯୋଗେ ଆଖଡ଼ା ଘୋଷଣା କରିଛି ଯେ, ସିଂହଦ୍ୱାର ସମ୍ମୁଖରେ ଆନ୍ଦୋଳନ କରୁଥିବା ସାଧୁ ହିଁ ପ୍ରକୃତ ନାଗାସାଧୁ। ସରକାରୀ କାଗଜପତ୍ରର ଦୁରୂପଯୋଗ କରି ନିଜକୁ ମହନ୍ତ ସଜାଇଥିବା ବ୍ୟକ୍ତି ଜଣକ ତ୍ରିଶୂଳ ପ୍ରସଙ୍ଗରେ ସମ୍ପୂର୍ଣ୍ଣ ନୀରବ ଅଛନ୍ତି। ଭାଇରାଲ ନାଗାସାଧୁଙ୍କ ଭାଷାରେ, ସେହି ନକଲି ମହନ୍ତ ହେଉଛନ୍ତି ଜଣେ ଛଦ୍ମବେଶୀ 'କାଳନେମୀ', ଯିଏକି ଧର୍ମ ନାମରେ ବ୍ୟବସାୟ କରୁଛନ୍ତି।

ଏହି ଘଟଣା ସମାଜରେ ତ୍ରିଶୂଳ ଏବଂ ସନାତନ ସଂସ୍କୃତିକୁ ନେଇ ଏକ ଭୁଲ୍ ବାର୍ତ୍ତା ଦେଉଛି ବୋଲି ଦର୍ଶାଇ, ସାରା ଦେଶର ସମସ୍ତ 'ତ୍ରିଶୂଳ ପ୍ରେମୀ' ତଥା ଜଗନ୍ନାଥ ଭକ୍ତମାନଙ୍କୁ ଏକାଠି ହୋଇ ଧର୍ମର ପ୍ରତୀକକୁ ରକ୍ଷା କରିବା ପାଇଁ ଭାଇରାଲ ନାଗାସାଧୁ ଆହ୍ୱାନ ଦେଇଛନ୍ତି। ପ୍ରଶାସନ ଏବଂ ଦେବୋତ୍ତର ବିଭାଗ ତୁରନ୍ତ ଏହି ଜମି ଦୁର୍ନୀତି ଏବଂ ନକଲି ମହନ୍ତଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ଜୋର ଧରିଛି।