ଭରଣପୋଷଣ ଖର୍ଚ୍ଚ ନଦେଲେ ଆକ୍ସନ୍: ସରକାରୀ କର୍ମଚାରୀଙ୍କ ଦରମାରୁ ସିଧାସଳଖ କଟିବ ଟଙ୍କା, CMଙ୍କ କଡ଼ା ତାଗିଦ

ଭୁବନେଶ୍ୱର -ଲାଲୁ ପ୍ରସାଦ ମଲ୍ଲ (କଳିଙ୍ଗ ସମ୍ବାଦ): ସ୍ତ୍ରୀ କିମ୍ୱା ସନ୍ତାନସନ୍ତତିଙ୍କୁ ଆଇନଗତ ଭରଣପୋଷଣ ସହାୟତା ଦେବାରେ ଅବହେଳା କରୁଥିବା ସରକାରୀ କର୍ମଚାରୀଙ୍କୁ ଏବେ ମହଙ୍ଗା ପଡ଼ିବ। ଛାଡ଼ପତ୍ର ସମ୍ପର୍କିତ ବା ଅନ୍ୟାନ୍ୟ କାରଣରୁ ପରିବାରଠାରୁ ଅଲଗା ରହୁଥିବା ପତ୍ନୀ ଏବଂ ସନ୍ତାନମାନଙ୍କର ପୋଷଣ ଖର୍ଚ୍ଚ ଦେବା ବାବଦରେ ମୁଖ୍ୟମନ୍ତ୍ରୀ ଆଜି ଏକ କଡ଼ା ତାଗିଦ କରିଛନ୍ତି। ଯଦି କୌଣସି କର୍ମଚାରୀ ଆଇନଗତ ଭାବେ ଧାର୍ଯ୍ୟ କରାଯାଇଥିବା ପୋଷଣ ଖର୍ଚ୍ଚ ଠିକ୍ ଭାବରେ ଦେଉ ନାହାନ୍ତି, ତେବେ ସେମାନଙ୍କ ବିରୋଧରେ ତୁରନ୍ତ ଏବଂ ଦୃଢ଼ ଆକ୍ସନ୍ ନିଆଯିବ।

ନୂଆ ନିର୍ଦ୍ଦେଶ ଅନୁଯାୟୀ, ଭରଣପୋଷଣ ଦେବାରେ ଖିଲାପ କରୁଥିବା ସମ୍ପୃକ୍ତ ସରକାରୀ କର୍ମଚାରୀଙ୍କୁ ଆଉ ଛାଡ଼ ମିଳିବ ନାହିଁ। ଏହି ରାଶିକୁ ସିଧାସଳଖ ସେହି କର୍ମଚାରୀଙ୍କ ମାସିକ ଦରମାରୁ କାଟି ଦିଆଯିବ। କେବଳ ସେତିକି ନୁହେଁ, କର୍ମଚାରୀଙ୍କ ଦରମାରୁ କଟାଯାଇଥିବା ଏହି ଟଙ୍କାକୁ ବିନା କୌଣସି ବିଳମ୍ବରେ ସିଧାସଳଖ ପତ୍ନୀ ବା ସନ୍ତାନସନ୍ତତିଙ୍କ ବ୍ୟାଙ୍କ ଆକାଉଣ୍ଟକୁ ପଠାଯିବାର ବ୍ୟବସ୍ଥା କରାଯିବ। ପରିବାରରୁ ବିଚ୍ଛିନ୍ନ ହୋଇଥିବା ମହିଳା ଏବଂ ପିଲାମାନେ ଯେପରି କୌଣସି ଆର୍ଥିକ ସଙ୍କଟର ସମ୍ମୁଖୀନ ନହୁଅନ୍ତି ଏବଂ ସେମାନଙ୍କ ଜୀବନଧାରଣ ପ୍ରଭାବିତ ନହୁଏ, ତାହାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଏହି କଠୋର ଆଭିମୁଖ୍ୟ ଗ୍ରହଣ କରାଯାଇଛି। ସରକାରଙ୍କ ଏହି ସିଧାସଳଖ ପଦକ୍ଷେପ ଫଳରେ ଭରଣପୋଷଣରୁ ବଞ୍ଚିତ ହେଉଥିବା ଅନେକ ଅସହାୟ ପରିବାରକୁ ନ୍ୟାୟ ମିଳିପାରିବ ବୋଲି ଆଶା କରାଯାଉଛି।