ଦୀର୍ଘ ୬ ବର୍ଷ ପରେ ଖୋଲିଲା ଶ୍ରୀଜଗନ୍ନାଥଙ୍କ ଜନ୍ମବେଦି: ଭକ୍ତଙ୍କ ପାଇଁ ଉନ୍ମୁକ୍ତ ହେଲା ଶ୍ରୀଗୁଣ୍ଡିଚା ମନ୍ଦିର, ପ୍ରଥମ ୩ ଦିନ ମାଗଣା ଦର୍ଶନ

ପୁରୀ (କଳିଙ୍ଗ ଦର୍ପଣ): ଲାଳୁ ପ୍ରସାଦ ମଲ୍ଲ 

ଦୀର୍ଘ ୬ ବର୍ଷର ପ୍ରତୀକ୍ଷାର ଘଟିଛି ଅନ୍ତ। ଶ୍ରୀକ୍ଷେତ୍ରରେ ମହାପ୍ରଭୁ ଶ୍ରୀଜଗନ୍ନାଥଙ୍କ ପବିତ୍ର ଜନ୍ମବେଦି ତଥା ଶ୍ରୀଗୁଣ୍ଡିଚା ମନ୍ଦିର ଆଜି ସର୍ବସାଧାରଣଙ୍କ ଦର୍ଶନ ନିମନ୍ତେ ପୁନର୍ବାର ଖୋଲିଛି। ରୀତିନୀତି ଅନୁଯାୟୀ ସ୍ୱତନ୍ତ୍ର ପୂଜାର୍ଚ୍ଚନା ସମ୍ପାଦନ ହେବା ପରେ ସକାଳ ୭ଟା ୪୫ ମିନିଟ୍‌ରେ ଭକ୍ତଙ୍କ ପାଇଁ ମନ୍ଦିରର ଦ୍ୱାର ଉନ୍ମୁକ୍ତ କରାଯାଇଛି।

​ଏହି ଐତିହାସିକ ମୁହୂର୍ତ୍ତରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଶ୍ରଦ୍ଧାଳୁମାନଙ୍କ ସହିତ ମନ୍ଦିର ପରିସରକୁ ପ୍ରବେଶ କରି ଦର୍ଶନ ବ୍ୟବସ୍ଥାର ତଦାରଖ କରିଥିଲେ। ଭକ୍ତମାନଙ୍କ ଭାବପ୍ରବଣତା ଓ ଶ୍ରଦ୍ଧାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ସୁରକ୍ଷା ଓ ଶୃଙ୍ଖଳିତ ଦର୍ଶନ ଉପରେ ସ୍ୱତନ୍ତ୍ର ଦୃଷ୍ଟି ଦିଆଯାଇଛି।

​୨୦୨୦ କରୋନା ମହାମାରୀ ପରଠାରୁ ବନ୍ଦ ରହିଥିଲା:

ଉଲ୍ଲେଖଯୋଗ୍ୟ ଯେ, ୨୦୨୦ ମସିହାରେ କରୋନା ସଂକ୍ରମଣ ବ୍ୟାପିବା ପରଠାରୁ ସୁରକ୍ଷା ଦୃଷ୍ଟିକୋଣରୁ ଶ୍ରୀଗୁଣ୍ଡିଚା ମନ୍ଦିରରେ ସାଧାରଣ ଦର୍ଶନ ବନ୍ଦ ରଖାଯାଇଥିଲା। ଏହି ସମୟ ମଧ୍ୟରେ ମନ୍ଦିରର ଆବଶ୍ୟକୀୟ ମରାମତି ଓ ସଂରକ୍ଷଣ କାର୍ଯ୍ୟ ମଧ୍ୟ ହୋଇଥିଲା। ଦୀର୍ଘ ବର୍ଷ ଧରି ମହାପ୍ରଭୁଙ୍କ ଆଡ଼ପ ମଣ୍ଡପ ତଥା ଜନ୍ମବେଦି ଦର୍ଶନରୁ ବଞ୍ଚିତ ଥିବା ଦେଶବିଦେଶର ଶ୍ରଦ୍ଧାଳୁଙ୍କ ମଧ୍ୟରେ ଏବେ ଉତ୍ସାହ ଖେଳିଯାଇଛି।

​ପ୍ରବେଶ ଶୁଳ୍କ ଓ ନିୟମ:

ଶ୍ରୀମନ୍ଦିର ପ୍ରଶାସନର ନିଷ୍ପତ୍ତି ଅନୁଯାୟୀ, ମନ୍ଦିର ଖୋଲିବାର ପ୍ରଥମ ତିନି ଦିନ ଶ୍ରଦ୍ଧାଳୁମାନଙ୍କ ପାଇଁ ପ୍ରବେଶ ସମ୍ପୂର୍ଣ୍ଣ ମାଗଣା ରହିବ। ତେବେ ତିନି ଦିନ ପରେ ମନ୍ଦିର ପରିସରର ରକ୍ଷଣାବେକ୍ଷଣ ଓ ବ୍ୟବସ୍ଥା ନିୟନ୍ତ୍ରଣ ପାଇଁ ଭକ୍ତଙ୍କ ପିଛା ୧୦ ଟଙ୍କା ଲେଖାଏଁ ପ୍ରବେଶ ଶୁଳ୍କ ଧାର୍ଯ୍ୟ କରାଯାଇଛି।

​ମନ୍ଦିର ଖୋଲିବା ମାତ୍ରେ ବହୁ ସଂଖ୍ୟାରେ ଭକ୍ତ ଶ୍ରୀଗୁଣ୍ଡିଚା ମନ୍ଦିରରେ ପହଞ୍ଚି ଜନ୍ମବେଦି ଦର୍ଶନ କରିବା ସହ ଜୟ ଜଗନ୍ନାଥ ଧ୍ୱନିରେ ପରିବେଶକୁ ଭକ୍ତିମୟ କରି ତୋଳିଛନ୍ତି।