ଡାବୁଗାଁ ରେ ମତ୍ସ୍ୟ ଏବଂ ପ୍ରାଣୀ ସମ୍ପଦ ମେଳା -2026

*📰 ଡାବୁଗାଁରେ ମତ୍ସ୍ୟ ଓ ପ୍ରାଣୀସମ୍ପଦ ମେଳା-୨୦୨୬: ଚାଷୀଙ୍କୁ ସ୍ୱାବଲମ୍ବୀ କରିବାକୁ ସରକାରୀ ଯୋଜନା ଓ ଋଣ ଉପରେ ଗୁରୁତ୍ୱ*

ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ ସଦର ମହକୁମାସ୍ଥିତ ଭୈରବ ମହାବିଦ୍ୟାଳୟ ଖେଳପଡ଼ିଆଠାରେ ଶୁକ୍ରବାର ବ୍ଲକସ୍ତରୀୟ ମତ୍ସ୍ୟ ଓ ପ୍ରାଣୀସମ୍ପଦ ମେଳା-୨୦୨୬ ମହାଆଡ଼ମ୍ବରରେ ଅନୁଷ୍ଠିତ ହୋଇଯାଇଛି। ମତ୍ସ୍ୟ ଚାଷ, ଗୋପାଳନ, କୁକୁଡ଼ା ଚାଷ, ଛେଳି ଓ ଘୁଷୁରି ପାଳନ ମାଧ୍ୟମରେ ଚାଷୀଙ୍କ ଆୟ ବୃଦ୍ଧି ସହ ସେମାନଙ୍କୁ ଆର୍ଥିକ ଭାବେ ସ୍ୱାବଲମ୍ବୀ କରିବା ଏହି ମେଳାର ମୁଖ୍ୟ ଉଦ୍ଦେଶ୍ୟ ଥିଲା।

ଏହି ମେଳାରେ ଡାବୁଗାଁ ବିଧାୟକ ମନୋହର ରନ୍ଧାରୀ ମୁଖ୍ୟ ଅତିଥି ଭାବେ ଯୋଗଦେଇ ମେଳାକୁ ଉଦ୍‌ଘାଟନ କରିଥିଲେ। ନିଜ ଅଭିଭାଷଣରେ ସେ କୃଷି ସହିତ ମତ୍ସ୍ୟ ଓ ପ୍ରାଣୀସମ୍ପଦ କ୍ଷେତ୍ରରେ ରହିଥିବା ବିଭିନ୍ନ ସୁଯୋଗର ସଦୁପଯୋଗ କରି ଚାଷୀମାନେ ନିଜର ଆୟ ବୃଦ୍ଧି କରିବାକୁ ଆହ୍ୱାନ ଦେଇଥିଲେ।

ସମ୍ମାନିତ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷ ମୋତିରାମ ନାୟକ ଯୋଗଦେଇ ମତ୍ସ୍ୟ ଚାଷ ମାଧ୍ୟମରେ ଚାଷୀମାନେ କିପରି ଅଧିକ ଲାଭବାନ ହୋଇପାରିବେ ସେ ସମ୍ପର୍କରେ ଆଲୋକପାତ କରିଥିଲେ। ଡାବୁଗାଁ ବ୍ଲକ ଅଧ୍ୟକ୍ଷା ବୀଣା ମାଝୀ ଚାଷ ଓ ଚାଷୀଙ୍କ ଉନ୍ନତି ସହ ସରକାରୀ ଯୋଜନାର ସୁଫଳ ନେବାକୁ ପରାମର୍ଶ ଦେଇଥିଲେ।

ଡାବୁଗାଁ ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ସିନିଗୋ ମୁର୍ମୁଙ୍କ ସଭାପତିତ୍ୱରେ ଆୟୋଜିତ ଏହି ସଭାରେ ସେ ସ୍ୱାଗତ ଭାଷଣ ଦେବା ସହ ସରକାରଙ୍କ ବିଭିନ୍ନ ମତ୍ସ୍ୟ ଓ ପ୍ରାଣୀସମ୍ପଦ ଯୋଜନା, ଋଣ ସୁବିଧା ଏବଂ ଏହାର ଲାଭ କିପରି ଚାଷୀମାନେ ପାଇପାରିବେ ସେ ବିଷୟରେ ବୁଝାଇଥିଲେ।

ଏହି ଅବସରରେ ଜିଲ୍ଲା ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ରମେଶ ଚନ୍ଦ୍ର ବେହେରା ଯୋଗଦେଇ ସରକାରଙ୍କ ବିଭିନ୍ନ ଯୋଜନାରେ ସାମିଲ ହୋଇ ଚାଷୀମାନେ କିପରି ଲାଭବାନ ହୋଇପାରିବେ ସେନେଇ ବିସ୍ତୃତ ଆଲୋଚନା କରିଥିଲେ। ନବରଙ୍ଗପୁର ଜିଲ୍ଲା ମତ୍ସ୍ୟ ଅଧିକାରୀ ବିଷ୍ଣୁ ଚନ୍ଦ୍ର କିଶାନ ମତ୍ସ୍ୟ ଚାଷର ବିଭିନ୍ନ ପଦ୍ଧତି ଓ ସରକାରୀ ସହାୟତା ବିଷୟରେ ଚାଷୀଙ୍କୁ ସଚେତନ କରିଥିଲେ।

ଅତିରିକ୍ତ ଜିଲ୍ଲା ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ପ୍ରକାଶ ମହାନ୍ତି (ଜୀବ କଲ୍ୟାଣ), ଡାକ୍ତର ପ୍ରଶାନ୍ତ କୁମାର ସାମଲ (ରୋଗ ନିୟନ୍ତ୍ରଣ) ଓ ଡାକ୍ତର ମନୋରଞ୍ଜନ ନନ୍ଦ (ପ୍ରାଣୀଧନ ଉତ୍ପାଦନ) ମଞ୍ଚରେ ଉପସ୍ଥିତ ରହି ପ୍ରାଣୀପାଳନର ବିଭିନ୍ନ ଦିଗ ଉପରେ ଆଲୋଚନା କରିଥିଲେ।

ମେଳାରେ ଡାବୁଗାଁ ବ୍ଲକର ୧୨ଟି ଗ୍ରାମ ପଞ୍ଚାୟତରୁ ବହୁ ସଂଖ୍ୟାରେ ଚାଷୀ ଯୋଗଦେଇଥିଲେ। ଚାଷୀଙ୍କୁ ବିଭିନ୍ନ ସରକାରୀ ଯୋଜନା ଓ ଆଧୁନିକ ଚାଷ ପଦ୍ଧତି ବିଷୟରେ ଅବଗତ କରାଇବା ପାଇଁ ବିଭିନ୍ନ ବିଭାଗ ପକ୍ଷରୁ ୧୨ଟି ଷ୍ଟଲ୍ ଖୋଲାଯାଇଥିଲା। ଏହି ଷ୍ଟଲ୍‌ଗୁଡ଼ିକ ମାଧ୍ୟମରେ ମତ୍ସ୍ୟ ଚାଷ, ପ୍ରାଣୀପାଳନ, ସରକାରୀ ଋଣ ଓ ସହାୟତା ଯୋଜନା ସମ୍ପର୍କରେ ଚାଷୀଙ୍କୁ ଆବଶ୍ୟକ ପରାମର୍ଶ ଓ ଦିଗଦର୍ଶନ ଦିଆଯାଇଥିଲା।

ମେଳାର ଅନ୍ୟତମ ଆକର୍ଷଣ ଥିଲା ସଫଳ ଚାଷୀମାନଙ୍କ ଅନୁଭୂତି ବର୍ଣ୍ଣନା। ସଫଳ ଗୋପାଳକ ସରସ୍ୱତୀ ପରିଡ଼ା ନିଜର ଗୋପାଳନ ଅନୁଭୂତି ବାଣ୍ଟିବା ସହ କିପରି ଗୋପାଳନ ମାଧ୍ୟମରେ ଆର୍ଥିକ ଲାଭ ପାଇପାରିଛନ୍ତି ତାହା ବୁଝାଇଥିଲେ। ସେହିପରି ଚଚରାଗୁଡ଼ା ଗ୍ରାମ ପଞ୍ଚାୟତର ଚାଷୀ କର୍ଣ୍ଣ ମାଝୀ ମାଛ ଚାଷରେ ନିଜର ସଫଳତା ବିଷୟରେ କହିଥିଲେ। ଛେଳି ଚାଷରେ ନର ଜାନି ଓ ଘୁଷୁରି ପାଳନରେ ମନବଧ ଜାନି କିପରି ଲାଭବାନ ହୋଇଛନ୍ତି ସେ ସମ୍ପର୍କରେ ନିଜ ଅନୁଭୂତି ପ୍ରକାଶ କରିଥିଲେ।

ଏହି ଅବସରରେ ସହକାରୀ ମତ୍ସ୍ୟ ଅଧିକାରୀ ରାଜେଶ ଦାସ ଡାବୁଗାଁ ବ୍ଲକରେ ବାୟୋଫ୍ଲକ୍ (ଜୈବ କୁଞ୍ଜ) ପ୍ରଣାଳୀରେ ମାଛ ଚାଷର ସଫଳତା ଉପରେ ଆଲୋକପାତ କରି ଓଡ଼ିଶାରେ ଏହି କ୍ଷେତ୍ରରେ ଡାବୁଗାଁ ବ୍ଲକର ଅଗ୍ରଣୀ ସଫଳତା ବିଷୟରେ କହିଥିଲେ। ମାଛ ଚାଷ ଯୋଜନାରେ ଚାଷୀଙ୍କୁ ମୋଟର ସାଇକେଲ ଭଳି ସହାୟତା ମିଳିବା ସହ ସେମାନଙ୍କ ରୋଜଗାର ବୃଦ୍ଧି ପାଇଥିବା ବିଷୟ ମଧ୍ୟ ଉପସ୍ଥାପନ କରାଯାଇଥିଲା।

ବାହାର ରାଜ୍ୟକୁ ଦାଦନ ଖଟିବାକୁ ନଯାଇ ନିଜ ଅଞ୍ଚଳରେ ମାଛ ଚାଷ, ଗୋପାଳନ, କୁକୁଡ଼ା ଚାଷ, ଛେଳି ଓ ଘୁଷୁରି ପାଳନ ଭଳି ଜୀବିକା ଗ୍ରହଣ କରି ସରକାରୀ ଯୋଜନାର ସହାୟତାରେ ସ୍ୱାବଲମ୍ବୀ ହେବାକୁ ଚାଷୀମାନଙ୍କୁ ଅତିଥିମାନେ ପରାମର୍ଶ ଦେଇଥିଲେ।

ଅନ୍ୟ ସମ୍ମାନିତ ଅତିଥିଙ୍କ ମଧ୍ୟରେ ବ୍ଲକ ଉପାଧ୍ୟକ୍ଷ ସଦାନନ୍ଦ ନାୟକ, ବିଜେପି ଜିଲ୍ଲା ଯୁବମୋର୍ଚ୍ଚା ସଭାପତି ଶୁଭଜିତ୍ ପାଣିଗ୍ରାହୀ, ଡାବୁଗାଁ ଜୋନ୍-୧ ଜିଲ୍ଲା ପରିଷଦ ସଭ୍ୟ ଧନ ସିଂ ଭତ୍ରା, ଜୋନ୍-୨ ଜିଲ୍ଲା ପରିଷଦ ସଭ୍ୟ ଗୁପ୍ତ ବିଶୋଇ ଓ ବିଜେଡି ବ୍ଲକ ସଭାପତି ସୁରେନ୍ଦ୍ର ମିଶ୍ର ପ୍ରମୁଖ ଯୋଗଦେଇଥିଲେ।

କାର୍ଯ୍ୟକ୍ରମକୁ ଭ୍ରାମ୍ୟମାଣ ପ୍ରାଣୀଧନ ଚିକିତ୍ସା ଅଧିକାରୀ ଡାକ୍ତର ମାୟାଧର ସାହୁ ସୁନ୍ଦର ଭାବେ ପରିଚାଳନା କରିଥିଲେ। ଶେଷରେ ଭୈରବ ଉଚ୍ଚ ମାଧ୍ୟମିକ ବିଦ୍ୟାଳୟର ଛାତ୍ରୀମାନେ ସମବେତ ନୃତ୍ୟ ପରିବେଷଣ କରି ଉପସ୍ଥିତ ଅତିଥି ଓ ଚାଷୀମାନଙ୍କୁ ମନ୍ତ୍ରମୁଗ୍ଧ କରିଥିଲେ। 5c

ମୋଟାମୋଟି ଭାବେ, ମତ୍ସ୍ୟ ଓ ପ୍ରାଣୀସମ୍ପଦ ମେଳା ଚାଷୀଙ୍କୁ ନୂତନ ଜୀବିକା, ସରକାରୀ ଯୋଜନା ଓ ଆତ୍ମନିର୍ଭରଶୀଳତାର ଦିଗ ଦେଖାଇବାରେ ଏକ ଗୁରୁତ୍ୱପୂର୍ଣ୍ଣ ମଞ୍ଚ ପାଲଟିଥିଲା।#fishing#dfonabarangpur