ମାଲକାନଗିରି ସହକାରୀ ନିର୍ବାହୀ ଯନ୍ତ୍ରୀଙ୍କ ଘରେ ଭିଜିଲାନ୍ସ ଚଢ଼ାଉ: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ୬ଟି ସ୍ଥାନରେ ରେଡ୍

ମାଲକାନଗିରି/ଭୁବନେଶ୍ୱର/କଲିଙ୍ଗ ଦର୍ପଣ/ରୋହିତ କୁମାର ନିଆଲ:

ଦୁର୍ନୀତିଗ୍ରସ୍ତ ଅଧିକାରୀଙ୍କ ଉପରେ ନିଜର କଡ଼ା ପ୍ରହାର ଜାରି ରଖିଛି ଓଡ଼ିଶା ଭିଜିଲାନ୍ସ। ଆୟ ବହିର୍ଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ମାଲକାନଗିରି ଡିଆରଡିଏ (DRDA) ସହିତ ସଂଲଗ୍ନ ଥିବା ମାଥିଲି ବ୍ଲକର ସହକାରୀ ନିର୍ବାହୀ ଯନ୍ତ୍ରୀ (AEE) ଶିଶିର କୁମାର ଦାଶଙ୍କର ଏକାଧିକ ଠିକଣା ଉପରେ ରବିବାର ଭିଜିଲାନ୍ସ ବିଭାଗ ପକ୍ଷରୁ ଏକକାଳୀନ ଚଢ଼ାଉ କରାଯାଇଛି।

ବ୍ରହ୍ମପୁର ସ୍ୱତନ୍ତ୍ର ଭିଜିଲାନ୍ସ ଜଜଙ୍କ ତରଫରୁ ଜାରି ହୋଇଥିବା ସର୍ଚ୍ଚ ୱାରେଣ୍ଟ ବଳରେ ଏହି ରେଡ୍ କରାଯାଇଛି। ଏହି ଚଢ଼ାଉରେ ୧ ଜଣ ଅତିରିକ୍ତ ଏସପି (Addl SP), ୫ ଜଣ ଡିଏସପି (DSP), ୫ ଜଣ ଇନ୍ସପେକ୍ଟର ଏବଂ ଅନ୍ୟାନ୍ୟ କର୍ମଚାରୀଙ୍କୁ ନେଇ ଗଠିତ ଏକ ବଡ଼ ଟିମ୍ ସାମିଲ ହୋଇଛନ୍ତି।

ଚଢ଼ାଉ ହେଉଥିବା ୬ଟି ସ୍ଥାନ ହେଲା:

ଭୁବନେଶ୍ୱରର ବରମୁଣ୍ଡା ସ୍ଥିତ ଏକ ବିଳାସପୂର୍ଣ୍ଣ ଚାରି ମହଲା ବିଶିଷ୍ଟ କୋଠା।

ବ୍ରହ୍ମପୁର ନୀଳାଚଳ ନଗରରେ ଥିବା ଦୁଇ ମହଲା ବିଶିଷ୍ଟ କୋଠା।

ଗଞ୍ଜାମ ଜିଲ୍ଲା ବାସୁଦେବପୁର (ଗୋବରା) ସ୍ଥିତ ଏକ ବାସଭବନ।

ବ୍ରହ୍ମପୁରର ଗଜପତି ନଗରରେ ଥିବା ତାଙ୍କର ପୈତୃକ ବାସଭବନ।

ମାଲକାନଗିରିରେ ସେ ରହୁଥିବା ଭଡ଼ା ଘର।

ମାଲକାନଗିରି DRDA କାର୍ଯ୍ୟାଳୟରେ ଥିବା ତାଙ୍କ ଅଫିସ୍ ଚାମ୍ବର।

ବର୍ତ୍ତମାନ ସୁଦ୍ଧା ଚଢ଼ାଉ ଜାରି ରହିଥିବାରୁ ଜବତ ହୋଇଥିବା ସମ୍ପତ୍ତିର ପ୍ରକୃତ ମୂଲ୍ୟ ଆକଳନ କରାଯାଇ ନାହିଁ। ତାଙ୍କର ବିଭିନ୍ନ ବ୍ୟାଙ୍କ ଆକାଉଣ୍ଟ, ଜମିଜମା କାଗଜପତ୍ର, ବୀମା ପଲିସି ଏବଂ ଅନ୍ୟାନ୍ୟ ବହୁମୂଲ୍ୟ ସାମଗ୍ରୀର ଟିକନିଖି ଯାଞ୍ଚ କରାଯାଉଥିବା ନେଇ ଭିଜିଲାନ୍ସ ପକ୍ଷରୁ ସୂଚନା ମିଳିଛି। ଚଢ଼ାଉ ସରିବା ପରେ ସମ୍ପତ୍ତିର ପ୍ରକୃତ ତାଲିକା ସାମ୍ନାକୁ ଆସିବ ବୋଲି ଆଶା କରାଯାଉଛି।