ବାଲିପଡ଼ାରେ ୫୩ତମ ଶାରଦୀୟ ଦୁର୍ଗାପୂଜା: ମହୀଶୂର ରାଜପ୍ରାସାଦ ଢାଞ୍ଚାରେ ନିର୍ମାଣ ହେଉଛି ଭବ୍ୟ ତୋରଣ

ନର୍ଲା, ୮ ଅକ୍ଟୋବର, କଲିଙ୍ଗ ଦର୍ପଣ (କବିରାଜ ଦୁର୍ଗା):

କଳାହାଣ୍ଡି ଜିଲ୍ଲା ନର୍ଲା ବ୍ଲକ୍‌ ଅନ୍ତର୍ଗତ ବାଲିପଡ଼ାଠାରେ ଚଳିତ ବର୍ଷ ୫୩ତମ ଶାରଦୀୟ ନବରାତ୍ର ଦୁର୍ଗାପୂଜା ପାଇଁ ପ୍ରସ୍ତୁତି ଜୋରଦାର ହୋଇଛି। ଆଉ ମାତ୍ର କେଇ ଦିନ ପରେ ଆରମ୍ଭ ହେବାକୁ ଥିବା ଏହି ମହୋତ୍ସବ ପାଇଁ ପୂଜାମଣ୍ଡପର ସାଜସଜ୍ଜା ଓ ତୋରଣ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଚଳିତ ବର୍ଷ ପୂଜା ଅବସରରେ କର୍ଣ୍ଣାଟକର ପ୍ରସିଦ୍ଧ ମହୀଶୂର ରାଜପ୍ରାସାଦର ଢାଞ୍ଚାରେ ଏକ ଭବ୍ୟ ତୋରଣ ନିର୍ମାଣ କରାଯାଉଛି, ଯାହାକି ଦର୍ଶକଙ୍କ ପାଇଁ ମୁଖ୍ୟ ଆକର୍ଷଣ ସାଜିବ।

ଆସନ୍ତା ଅକ୍ଟୋବର ୧୦ ତାରିଖରୁ ୨୦ ତାରିଖ ପର୍ଯ୍ୟନ୍ତ ଏହି ଉତ୍ସବ ଚାଲିବ। ଏଥିପାଇଁ ପୂଜା କମିଟି ପକ୍ଷରୁ ଅଞ୍ଚଳର ବିଭିନ୍ନ ଗ୍ରାମକୁ ଯାଇ ନିମନ୍ତ୍ରଣପତ୍ର ବଣ୍ଟନ କରାଯିବା ସହ ଶ୍ରଦ୍ଧାଳୁମାନଙ୍କୁ ଉତ୍ସବରେ ଯୋଗଦେବାକୁ ଆମନ୍ତ୍ରଣ କରାଯାଇଛି। ପୂଜା ଦିନଗୁଡ଼ିକରେ ପ୍ରତିଦିନ ଭକ୍ତମାନଙ୍କ ପାଇଁ ଅନ୍ନପ୍ରସାଦ ବ୍ୟବସ୍ଥା କରାଯାଇଛି।

ଲୋକକଳାକୁ ପ୍ରୋତ୍ସାହନ:

ଉତ୍ସବ ଅବସରରେ ସ୍ଥାନୀୟ ଲୋକକଳା ଏବଂ ସାଂସ୍କୃତିକ ପରମ୍ପରାକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ବିଭିନ୍ନ ମନୋରଞ୍ଜନଧର୍ମୀ କାର୍ଯ୍ୟକ୍ରମର ଆୟୋଜନ କରାଯାଇଛି। ଚୁନୀ ବଗର୍ତ୍ତୀ ଦଣ୍ଡନୃତ୍ୟ, ମିକ୍ସଚର କିଚକବଧ, ଝିଅ ରାମଲୀଳା, ମାଷ୍ଟର ମହିଳା ଦଣ୍ଡକୀର୍ତ୍ତନଧାରା ଏବଂ ପୁରୁଷ ମିକ୍ସଚର ରାମଲୀଳା ଆଦି ପରିବେଷଣ କରାଯିବାର କାର୍ଯ୍ୟସୂଚୀ ରହିଛି।

ପରିଚାଳନା କମିଟିର ସହଯୋଗ:

ଏହି ବିଶାଳ ଆୟୋଜନକୁ ସଫଳ କରିବା ପାଇଁ ପୂଜା ପରିଚାଳନା କମିଟିର ସମସ୍ତ କର୍ମକର୍ତ୍ତା ଦିନରାତି ଏକ କରିଦେଇଛନ୍ତି। କମିଟିର ମୁଖ୍ୟ ଉପଦେଷ୍ଟା ପରେଶ କୁମାର ପଧାନ, ଅନ୍ତରାମ ମାଝୀ (ଭାନପୁର ସରପଞ୍ଚ ତଥା ନର୍ଲା ସରପଞ୍ଚ ସଂଘ ସଭାପତି), ବାଗପୁର ସରପଞ୍ଚ ଗୋପାଳ ହାତୀ, ସଭାପତି ଲୋଚନ ସାହୁ, ଉପସଭାପତି ରୋହିତ ସାହୁ, ସାଧାରଣ ସମ୍ପାଦକ କୁନ୍ତ ଭୋଇ, ପୂଜା ସମ୍ପାଦକ ଅଶୋକ କୁମାର ବାରିକ, ସହସମ୍ପାଦକ ଜିତୁ ପଧାନ ଓ ମହିନ୍ଦ୍ର ସାହୁ, ସମ୍ପାଦକ ବବ୍ଲୁ ଭୋଇ ଓ ପ୍ରବୀଣ ରଣା, ମନୋରଞ୍ଜନ ସମ୍ପାଦକ ରତିଲାଲ ସାହୁ ଓ ବାଲାଜୀ ବେହେରା ଏବଂ ମିଡିଆ ସେଲ୍‌ ସମ୍ପାଦକ ଟୁକୁ ପଧାନଙ୍କ ସମେତ ବରିଷ୍ଠ ସଦସ୍ୟମାନେ ପରିଚାଳନା ଦାୟିତ୍ୱ ତୁଲାଉଛନ୍ତି। ଏଥିସହିତ ସ୍ଥାନୀୟ ବଣିକ ସଂଘର ସଦସ୍ୟ ଏବଂ ଭାନପୁର ଗ୍ରାମର ବୁଦ୍ଧିଜୀବୀ ଓ ମାନ୍ୟଗଣ୍ୟ ବ୍ୟକ୍ତିମାନେ ସହଯୋଗ କରୁଛନ୍ତି।

ମା’ଙ୍କ ଆଶୀର୍ବାଦରୁ ପୂର୍ବବର୍ଷଗୁଡ଼ିକ ପରି ଚଳିତ ବର୍ଷ ମଧ୍ୟ ଏହି ମହୋତ୍ସବ ଶାନ୍ତିଶୃଙ୍ଖଳାର ସହ ସମ୍ପନ୍ନ ହେବ ବୋଲି ଅଞ୍ଚଳବାସୀ ଦୃଢ଼ ଆଶାବ୍ୟକ୍ତ କରିଛନ୍ତି।