ବରଗାଁ ଉତ୍କଳମଣି ଗୋପବନ୍ଧୁ ଯୁବକ ସଂଘରେ ପବିତ୍ର ଗୁରୁଦିବସ ପାଳିତ: ଶିକ୍ଷାର ମହତ୍ତ୍ୱ ଉପରେ ଆଲୋଚନା ଚକ୍ର ଅନୁଷ୍ଠିତ

ବରଗାଁ, ୫ ସେପ୍ଟେମ୍ବର (କଳିଙ୍ଗ ସମ୍ବାଦ, ରୋହିତ କୁମାର ନିଆଳ):

ସ୍ଥାନୀୟ ବରଗାଁ ସ୍ଥିତ ଉତ୍କଳମଣି ଗୋପବନ୍ଧୁ ଯୁବକ ସଂଘ ପରିସରରେ ଶନିବାର ଦିନ ପବିତ୍ର ଗୁରୁଦିବସ ପାଳିତ ହୋଇଯାଇଛି। ଏହି ଅବସରରେ ଆୟୋଜିତ ସଭାରେ ସର୍ବପ୍ରଥମେ ମହାନ ଦାର୍ଶନିକ ତଥା ପୂର୍ବତନ ରାଷ୍ଟ୍ରପତି ଡକ୍ଟର ସର୍ବପଲ୍ଲୀ ରାଧାକୃଷ୍ଣନଙ୍କ ଫଟୋଚିତ୍ରରେ ପ୍ରଦୀପ ପ୍ରଜ୍ୱଳନ ତଥା ପୁଷ୍ପମାଲ୍ୟ ଅର୍ପଣ କରାଯାଇ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଥିଲା।

ଉତ୍କଳମଣି ଗୋପବନ୍ଧୁ ଯୁବକ ସଂଘର ସମ୍ପାଦକ ସୁଧୀର କୁମାର ଖମାରୀ ଏହି କାର୍ଯ୍ୟକ୍ରମରେ ସଭାପତିତ୍ୱ କରିଥିଲେ। ଏହି ଗୁରୁଦିବସ ପରିପ୍ରେକ୍ଷୀରେ ସମାଜ ଗଠନରେ ଗୁରୁମାନଙ୍କର ଅବଦାନକୁ ସ୍ମରଣ କରାଯାଇ ଗୁରୁଜନମାନଙ୍କୁ ସମ୍ମାନ ଓ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଏହାବ୍ୟତୀତ ଆଗାମୀ ପିଢ଼ିର ସାମଗ୍ରିକ ବିକାଶ ପାଇଁ ‘ଶିକ୍ଷାର ମହତ୍ତ୍ୱ’ ଶୀର୍ଷକ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା, ଯେଉଁଥିରେ ବକ୍ତାମାନେ ଶିକ୍ଷାର ଆବଶ୍ୟକତା ଉପରେ ନିଜ ନିଜର ମତ ରଖିଥିଲେ।

ଏହି ସଭାରେ ସଂଘର ସଭାପତି ବିଷ୍ଣୁଚରଣ ଖମାରୀ ଉପସ୍ଥିତ ଥିବା ବେଳେ କର୍ମକର୍ତ୍ତା ଭିକାରୀ ଦୁର୍ଗା, ଧର୍ମରାଜ କର ଏବଂ ସରୋଜ ମହାନନ୍ଦ ପ୍ରମୁଖ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଅଖିଳ ଭାରତ ଛାତ୍ର ସଂଘ (A.I.S.F) ର ଜିଲ୍ଲା ସଭାପତି ରାଜାରାମ ଡଙ୍ଗରି ଏବଂ ଏ.ଆଇ.ଏସ.ଏଫ ଜିଲ୍ଲା ସମ୍ପାଦକ ଡୋଲେଶ୍ୱର ଖମାରୀ ଅତିଥି ଭାବେ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ।

ଏହି କାର୍ଯ୍ୟକ୍ରମରେ ଛାତ୍ରଛାତ୍ରୀମାନଙ୍କ ମଧ୍ୟରେ ମଧୁସ୍ମିତା ଖମାରୀ, ନମିତା ଖମାରୀ, ପ୍ରଦ୍ୟୁମ୍ନ ଖମାରୀ, ରାକେଶ ଖମାରୀ, ଅଞ୍ଜଳି ବାଗ, ସୃତି ଖମାରୀ, ଗୌରହରୀ ଖମାରୀ, ଉତ୍ତମ ଖମାରୀ, ବିସିକେଶନ ପାରଭୋଇ, କ୍ରିଷ୍ଣା ଖମାରୀ, ରିଶୀ କର ଏବଂ ସିଦ୍ଧି ଖମାରୀ ପ୍ରମୁଖ ସକ୍ରିୟ ଅଂଶଗ୍ରହଣ କରିଥିଲେ। ପରିଶେଷରେ ସଭାପତିତ୍ୱ କରୁଥିବା ସମ୍ପାଦକ ସୁଧୀର କୁମାର ଖମାରୀ ସମସ୍ତ ଅତିଥି, କର୍ମକର୍ତ୍ତା ଓ ଛାତ୍ରଛାତ୍ରୀମାନଙ୍କୁ ଆନ୍ତରିକ ଧନ୍ୟବାଦ ଅର୍ପଣ କରିବା ପରେ ସଭା କାର୍ଯ୍ୟ ସାଙ୍ଗ କରାଯାଇଥିଲା।